Padang — Anggota Komisi XIII DPR RI dari Fraksi Partai NasDem, M. Shadiq Pasadigoe manyilau petani di Korong Gadang, Kecamatan Kuranji Kota Padang, Rabaa Patang ko (5/8/2026) untuk manampuang aspirasi masyarakat sakalian maninjau rencana pambangunan jo parbaikan saluran irigasi malalui Program Percepatan Peningkatan Tata Guna Air Irigasi (P3TGAI)
Dalam kasampatan tu, Shadiq basuo jo babarapo unsur masyarakat, di antaro nyo urang tani, panguruih Perkumpulan Patani Pamakai Aia (P3A), niniak mamak, cadiak pandai, tokoh pemuda, sarato warga di sinian.
Dalam dialog nan akrab tu, masyarakat manyampaikan baragam harapan jo usulan, mulai dari paralu nyo parbaikan saluran irigasi, paningkatan sarana panunjuang patanian, sampai ka Program P3TGAI nan kok dapek dipalaweh cakupan nyo di Sumatera Barat.
Manuruik Shadiq, jaringan irigasi nan elok adolah pondasi utamo untuak maningkekkan hasia tani jo mampakokoh katahanan pangan nasional. Dek karano tu, inyo baazam akan taruih mampajuangkan panambahan alokasi Program P3TGAI malalui kementerian nan takaik, supayo labiah banyak kalompok tani nan dapek maraso manfaatnyo.
“Ambo mamintak ka pamarintah pusat supayo manambah volume bantuan Program P3TGAI. Kini masih banyak kalompok tani nan paralu pambangunan jo rehabilitasi saluran irigasi. Program ko lah tabukti mambari manfaat gadang ka patani karano taraso langsung ka paningkatan hasia patanian,” kato Shadiq.
Mantan Bupati Tanah Datar duo periode tu juo manyabuikkan, pado tahun 2026 Kabupaten Tanah Datar mandapek limo kalompok panarimo Program P3TGAI nan diparjuangkan malalui Fraksi Partai NasDem di DPR RI. Kini saluruah kagiatan tu alah masuak tahap palaksanaan pakarajaan, jo diharokkan salasai sasuaikan jadwal supayo hasilnyo bisa sanagari diraso dek masyarakat.
Shadiq manilai, pambangunan infrastruktur irigasi indak sajo maningkekkan produksi patanian, tapi juo mambari jaminan katasadioan aia untuak sawah, nan antaro lain akan mampauaik katahanan pangan jo maningkekkan kasajahteraan urang tani.
Samantaro tu, tokoh masyarakat Korong Gadang, Dedy Wahyudi, manyampaian harapan lo, ka Shadiq Pasadigoe nan dinilai salalu hadir manampuang jo mamarjuangkan aspirasi masyarakat.
“Kami maucapkan tarimo kasih ka pak Shadiq nan salalu datang mandanga suaro masyarakat. Inyo adalah senior ambo di KNPI. Ambo mancaliak inyo sabagai sosok nan punyo kapadulian tinggi ka dunia pendidikan, kagiatan sosial kamasyarakatan, pambardayaan masyarakat, sarato indak parnah baranti mamarjuangkan kapantiangan rakyat. Mudah-mudahan apo nan diparjuangkan kini capek tacapai untuak kabaikan urang tani jo masyarakat Korong Gadang,” kato Dedy.
Manuruik Dedy, kahadiran langsung anggota DPR RI di tangah masyarakat mambuktikan bahaso aspirasi warga indak hanyo didanga, tapi juo dibao dan diparjuangkan sampai ka pamarintah pusat.
Mangakhiri kunjungan nyo, Shadiq maajak saluruah urang tani, panguruih P3A, jo masyarakat untuak taruih manjago sumangaik gotong royong sarato marawat jaringan irigasi nan lah ado maupun nan baru dibangun, supayo manfaatnyo dapek diraso anak kamanakan sampai ka maso nan ka datang.
“Pambangunan indak akan barhasil kalau indak dipasamoan dek masyarakat. Marilah kito jago fasilitas nan lah ado, hiduik kan baliak budaya bagotong royong, jo basamo-samo mamajukan sektor patanian demi kasajahteraan masyarakat,” kato Shadiq. (Tan Parpatiah)
Dapatkan update berita lebih cepat dengan mengikuti Google News Khazminang.id. Klik tanda bintang untuk mengikuti.
