×

Iklan


TAROPONG

27 Nov 2020 | 11:39:59 WIB Last Updated 2020-11-27T11:39:59+00:00
    Share
iklan
TAROPONG
Bahren

Hari Guru

Oleh : Bahren*

 

    Baru patang kalamri  kito marayokan hari guru. Hari nan dijadika sabagai bantuak hormat kito ka apak jo ibuk guru nan alah manjadikan kito kasadonyo manjadi urang-urang nan bailimu sarato tapandang. Di babagai-bagai media banyak lah muncul capan-ucapan salamaik ka guru-guru nan alah bajaso.

    Dari sabanyak tu ucapan salamaik ciek nan manjadi paratian dek ambo. Ucapan tu babunyi guru memang bukan urang nan hebat, tapi sado urang hebat ateh jaso dari guru. Guru na lah manunjuak aja nyo inggan bisa manulih jo mambaco. Guru pulo nan maajakan kito bisa baretong, mangali mambagi manambah jo mangurangi. Guru pulo lah agaknyo nan manjadikan kito manjadi urang nan suko mambaco, bapikia sabalun batindak sarato banyak lain an lainnyo.

    Agamo manjalehkan ka kito baso, rumah iyolah sikola nan paliang partamo. Jikok kito inok sarato manangkan aratinyo bana indak sajo guru di sikola  pormal sajo agaknyo nan harusnyo kito rayokan harinyo tapi ayah jo amak kito sabagai guru kito nan partamo kali sabalun masuak sikola patuik juo agaknyo mandapekkan ucapan slamaik nangko. Kini, baa dek awak lai, apokoh acara marayokan hari guru ko cukuik hanyo sabagai bantuak seremonial sajo sarupo nan taralah, atau ado samacam tindakan nyato dari kito untuak guru-guru kito ko.

    Baa dek baitu kato ambo, karano jikok awak silau-silau labiah mandalam iyo sabana sadiah kito mancaliak nasib guru-guru kito ko, apolai nan manjadi guru honor. Ado kabanyo nan honornyo indak dibayia, ado pulo kabanyo honor nyo jauh labiah ketek jikok dibandiangkan dari gaji buruah. Indak hanyo itu sajo, ado pulo diantaro guru-guru ko nan mandapek tindakan indak sopan dari anak-anaknyo. Ado nan dibantak-bantak, ado nan dicaruik-caruik i, bahkan ado nan sampai maajak gurunyo batinju. Jikok itu nan lah tajadi, apo nan bisa kito parambiak lai.

    Mako limbak nan dari pado itu, dek sakarang kini nangko masih angek-angeknyo paringatan hari guru molah kito mamuliakan liau-liau tu, guru-guru kito. Nan alah manjadikan kito dari urang nan biaso sajo manjadi urang-urang nan tapandang. Manjadi urang-urang nan sukses. Sarupo ajaran agamo maajakan kito untuak taat ka guru sasudah taat ka Allah jo Nabi Muhammad, baitu juo mandanga parintah, parintah guru tu harus diikuti sasudah maikuti parintah Allah jo parintah nabi. Salamaik hari guru untuak guru-guru ambo dima sajo liau kini barado. n *Dosen Sastra Minangkabau Unand