×

Iklan

CARITO MINANG
Tagiah Gilo pado Kayo

30 Maret 2021 | 09:33:36 WIB Last Updated 2021-03-30T09:33:36+00:00
    Share
iklan
Tagiah Gilo pado Kayo

Oleh: ALWI KARMENA


Tagiah gilo pado kayo adolah gala untuak rang andia. Nan Si Kaidir McKenzi (Baitu acok nyo perkenalkan namonyo)  ko alun gilo lai doh, alun pulo panah kayo, tapi andia iyo. Sajak pandai basarawa inyo lah tampak bakat andia dek urang. Badan lai gadang badagok tapi bodoh. Makonyo ado juo uang manggalai dirinyo si Gabod.alias si Gadang Bodoh, dulu sikola es empe nyo anam taun. Tiok taun tingga. Kawan lah tamaik SMA nan inyo masih di SMP juo.

    Diliek sakileh si Kaidir  ko lai indak kanampak an bana bodohnyo doh. Tapi kalau dipabiakan inyo mangecek, mahota, sapuluah datiak sajo lah tabukak andianyo. Kecek inyo sarik nan masuak aka. Tiok nyo mangecek urang mancibia, malah ado nan mamancakan kantuik.
    Ka Makah bisa inyo baliak hari, kudo bantanduak dek nyo,As Limbek basisiak...

    Ciek kaistimewaannyo, inyo indak pamalu. Urek malunyo indak tumbuah. Dicimeehkan urang, indak panah inyo tau doh. Diopok opok urang, dikecek an urang Kaidir  santiang, lah taraso iyo pulo dek inyo.

    ”Wakden iyo santiang...,” akunyo ka sia nan nyo ajak mahota.

    Kapatangko, inyo duduak d lapau, ditampek nan gaek gaek bakumppua. Urang uzua. Urang gaek pakak. Urang gaek  rabun, urang gaek pikun bakumpua di lapau tu.  Disiko Kaidir  maraso urang nan paliang santiang. Salain paliang mudo, inyolah nan mangaku banyak pargaulan.

    Sadang duduak duduak tu, lalu sapasang turis urang bule. Kaduo urang tu kamancaliak caliak partunjukan kesenian atau kabudayaan. Mandakeklah urang bule tu kalapau. Nan gaek gaek di lapau tu sabana indak tau apo nan kadikecekan doh.

    ”Kaidir lah...nan santiang...bisa babaso inggirih jo ulando saketek, tanyolah apo nan katuju dek Ulando tuh”

    Kaidir  dikecek an co itu lansuang mahimbau kaduo turis tu.

    “Halooo Halooo...”saponyo mangabik an tangan. Kaduo turis tu bagageh tibo. Inyo sabana paralu informasi. Nan Kaidir  mulai cameh. Ilang aka apo nan kadikecek an. Bahaso Inggirih nan nyo tau hanyo tujuah patah kato, yes, no, ai laf yu, sengkiyu, no smoking jo don porget....eh tambah ciek lai, oke.

    “Oooo yeeahh, sengkiyu...”jawek si Bule tu.

    “Yes..yes sama sama sengkiyu...apa  yu don forget...”

    Urang bule  paniang mandanga apo nan dikcek an si Kaidir .

    “Waaaat? wat du yu min don forget...”tanyo nan padusi.

    “Yes..Ai laf yu. Yu don forget...kan...?”

    Nan jantan mangaruik an kaniang sato paniang mandanga nan dikecek an si Kaidir. Inyo samo inyo ma nggeleang.

    “We don andeesten...” keceknyo.

    “Andesten kan sama no smoking...yu no smoking...?”

    “Oh no Nn. Ay don laik sigaretes...”jawek si bule jantan.

    “Garetes..no garetes...yes lah...oke...sengkiyu...”

    Kaduo bule tu manggeleang. Nan surang manyilangkan tunjuaknyo di kanang sambia balalu dari lapau tu.

    Apo keceknyo tadi tu? Garetes garetes apo tu?”tanyo inyiak Pi’i sambia mangaruik kaniang.

    Kaidir  maangguak angguak bantuak rang cadiak.

    “Inyo manggaretek garek mangecek jo wakden

    “Nan no somking ang kecek an tadi tu...?”

    “Heh. Itu kan ado di tampek pompa bensin. No Smoking....den kecek an pulo ka inyo...”Ay laf yu tu....Nan padusi tu katuju jo awak den.. Tapi aden lah babini... karano tu nyo kuciwa...pai se inyo lai.

    Itulah contoh gadang hotanyo si Kaidir. Inyo andia, urang lain nyo hota pulo.....