|
| Pak Benur Sumbar Irwan Prayitno katiko maadiri alek anak Walikota Solok Zul Elfian dan Zulmiyetti di Masajik Agung Al Muhsinin Kota Solok, Sabtu (13/6/2020). |
PADANG, Khazminang—Kok dak adoh aral malintang pak benur Sumbar Irwan Prayitno ka mamparalek-an anak liau salamo tigo hari baturuik-turuik mulai dari tanggal 6 sampai 8 November 2020. Hebatnyo sasudah alek tu salasai, sahari sasudah tu aturan Pak Walikota Padang malalui Surek Edaran Nomor: 870.743/BPBD-Pdg/X/2020, tantang larangan baralek sarato batasan operasional kauntuak palaku usaho mulai balaku, tanggal 9 November 2020.
Babagai pandapek muncua sabalun alek tu dilangsuangkan dek sipangka. Ado nan mangecekan, yo sabana baruntuang anak pak benur ko nyo ! Tapi adoh pulo nan baprasangko buruak sarato manyabuik baso alah ado “main mato” antaro pak wali jo pak benur ko, sahinggo aturan larangan baralek nan dikaluan pak wali mulai balaku persis bana sahari sasudah alek anak pak benur tu.
Agak taibo juo hati pak benur awak ko tampaknyo, sahiggo liau ko maraso paralu untuak maluruihan pandapek nan indak suai jo kanyataan nan liau alami.
Kecek pak benur ko ka wartawan, hari Kamih 5 November 2020, sabananyo baralek anak liau tu ka dilangsuangkan tanggal 4-6 Desember 2020. Tapi dek pak wali mangaluan surek edaran baso masyarakaik indak buliah madoan alek baralek tahituang samanjak tanggal 9 November, akianyo tanggal alek nan alah tabuek tu tapaso dibatalkan sarato diganti manjadi tanggal 6-8 November 2020.
“Jadi dalam pakaro ko indak adoh urusan jo “main mato” bagai doh. Pihak sipangka sarato panitialah nan akianyo mamutuihan jadwal baralek di bulan Desember tu dituka manjadi tanggal 6-8 November,” kecek pak benur awak ko manjalehan.
Karano alek anak liau ko diadoan di tangah maso pandemi Covid-19 nan masih basijadi, pak benur ko mamastian baso alek nan balangsuang salamo tigo hari tu diadoan sasuai jo protokol kasehatan nan balaku.
“Ambo sabagai urang gaek tantu batangguangjawek maagiah kasempatan ka anak untuak manikah, tapi tantu aleknyo harus sasuai jo protokol kasehatan nan balaku,” kecek pak benur majalehan.
Pak benur ko pun manjalehan baa kok alek tu balangsuang salamo tigo hari. “Alek tu dibuek tigo hari supayo tamu nan tibo indak manumpuak. Makonyo satiok tamu nan tibo alah ditantuan jam nyo masiang-masiang. Jadi, kalau hanyo sahari sajo, tantu jamnyo indak cukuik doh,” kecek pak benur manjalehan duduak pakaronyo. (Febriansyah Fahlevi)
