|
Mungkin banyak dari dunsanak nan baru sakali ko mandanga namo maco pado. Ambo taingek maso ketek uwok maco pado ko acok dibeuk enek ambo katiko ambo jo urang tuo ambo pulang kampung.
Apo sabananyo maco pado ko? Sarato dari ma asa makanan ko? Maco pado marupokan makanan yang tabuek dari buah simauang nan alah dipermentasikan. Sasudah mengalami permentasi buah simauang tadi disangrai samo karambia sarato jo ikan asin lainnyo. Karano proses ikolah makonyo maco padao barubah warna manjadi itam.
Maco pado marupokan masakan khas asli dari Bukiktinggi. Di zaman kini makanan ko marupokan makanan nan langka basuo jo awak. Di pakan-pakan pun kini alah indak ado urang nan manjua makanan ko. Terkahir ambo ka Bukiktinggi ambo basok urang manjua makanan ko di pasa bawah. Itu pun hanyo surang urang nan manjuanyo jo harago manuruik ambo agak maha.
Kalau ambo liek dari susahnyo madapekan maco pado ko di zaman kini aratinyo makanan ko alah ampia punah. Kalua makanan ko punah aratinyo dari segi ilmu linguistik tantu kosa kata iko pun akan manjadi punah karano indak adonyo perwarisan ka generasi barikuiknyo.
Itu tadi saketek panjaleh dari maco pado. Kini kito masuak baa bana caro mambuek makanan ko. Maco pado iolah bahan dasar untuak mambuek samba uwok maco pado. Caro mambueknyo samo bana jo mambuek samba cangkuak ikan tri. Kini ambo uraikan baliak bahan-bahan untuak mambuek samba uwok maco pado sarato caro mambueknyo.
Bahan-bahan nan harus kito siapkan untuak mambueknyo adolah patamo, tantu sajo maco pado tadi sabagai bahan utamonyo. Kaduo ado aia nasi. Biasonyo urang tuo ambo manambahkan taruang ketek-ketek agak ampek buah nan bagian tangahnyo alah dibalah. Sasudah tu sasendok teh lado giliang, sarato 6 buah bawang merah nan alah diirih. Sabatang bawang prai nan dipotong ketek-ketek. Lanjuik tomat duo buah nan alah dipotong-potong. Salanjuiknyo daun kunik saalai, nan trerakhir garam sacukuiknyo.
Itu tadi bahan-bahan nan diparalukan untuak mambuek maco pado. Kini kito masuak ka caro mambueknyo. Caro mambuek makanan ko iyo sabana mudah. Langkah patamo sadiokan wadah, masukan maco pado, lado giliang, bawang merah, bawang prai, tomat sarato daun kunik. Di bagian paliang ateh masukan taruang tadi. Sasudah tu baru siram jo aia nasi tadi. Langkah salanjuiknyo wadah nan alah barisi bahan-bahan tadi diagekan di ateh nasi dalam magiccom. Atau bisa juo dunsanak masak dalam kuali di masak di ateh kompor.
Baa dunsanak sabana mudah caro mambueknyo kan? Bagi
dunsanak nan panasaran jo raso samba ko buliah langsung dieksekusi. Selamaik
cepak cepong !
