×

Iklan

Oleh: Bahren*
Sagalo Ampek

27 Mar 2021 | 21:19:38 WIB Last Updated 2021-03-27T21:19:38+00:00
    Share
iklan
Sagalo Ampek
Bahren



    Sagalo ampek, iko lah judul nan kito piliah kiniko. Walaupun di maso sabalunnyo kito lah parnah juo bicaro parakaro sagalo nan ampek ko. Nan paratamo parnah di surah sarato dibaco parakaro urang tuo ampek, kok dibaco masalah tuo nan ampek iyolah nan paratmo tuo sendok. Tuo sendok kadisabuik gilo mangacau tiok hari nan ndak paralu dikacau dikacaunyo.

     

    Nan Kaduo tuo tunggu, indak paduli jo angek dingin dalam kampuang dan inyo badiam diri sajo jo untuangnyo, nak apo pun nan tajadi tajadilah nan pantiang ambo indak digaduah. Nan katigo tuo umua, gilo man den tiok ari, sagalo sasuatu inyo nan paliang tau jo paliang paham, karano nan tuo tu den, aden alah baumua, asam jo garam ma nan alun den cubo. Walaupun indak ciek juo nan manjadi. Indak ciek juo nan putuih dek tuo nyo itu, karano urang nan paralu makan indak paralu baumua tuo tapi indak maagiah salusi jo jalan kalua. Nan ka ampek tuo niniak mamak. Kok nan iko iyo nan paralu. Kok ka manjadi tuo juo, iyolah tuo niniak mamak, kok ka pai tampek baiyo jo batido, kok ka pulang tampek batanyo jo baraja, ikolah urang tuo nan sabananyo.

     

    Ampek nan parnah juo nan parnah kito baco, iyolah padusi nan ampek. Apo bana padusi nan ampek, nan paratamo padusi lawah-lawah, kok disabuik kalau padusi lawah-lawah, bantuak sarupo elok bana, bak cando urang patuah laku, kalua rumah nyo pantangan, kalua rumah bakutiko tapi ati busuak itikaik salah, nyo tahan jarek di pintu, kok ado nan sasek inggok, nyo isok darah sampai kariang, itu padusi nan cilako.

     

    Nan kaduo, padusi alang-alang. Kalau padusi nan palala, padusi banamo alang-alang. Katiko dapek angin nan salasai, Tabang nak tinggi dari gunuang, nak satampuak jo bintang timua, gilo malenggok ilia mudiak, pai tak ado nan di anta, pulang tak ado nan dibaok, bumi bulek alam bapaliang. Jikok iradaik mahandaki, dihoyak topan jo badai, karateh cabiak bingkai lah rarak, namuah nyo carai jo pingalan, pado tasangkuik ateh rumah, itu padusi nan palala. Nan Katigo padusi i bungo cangkeh, kutiko tampuak lai bagatah, samaso badaun rimbun, rimbun bak bungo kacubuang, rampak bak bungo kalikih, babungo di ujuang rantiang, di tanai daun nan banyak, jikok iradaik mahandaki, kok kucuik bugo nan kambang, tampak taguah kok nyo layua, lareh digoyang angina, gadang ketek sato mancari, tuo jo mudo mangampuangan, kok tajajak kapakan rami, Bagaluik kilo jo timbangan, awak ketek harago maha, bamintak makonyo dapek, batanyo an makonyo ado, itu nan patuik upiak pakai, banamoan padusi bapusako, walau tatungkuik tagulampai, indak karusak rumah tango.

     

    Nan ka ampek padusi bungo mawa, sadang bungo lai kambang, banyak lah kumbang nan mancari, tapi badarah-darah mandapek kan nyo dek badan bapaga duri, tapi kok nan kambang alah kuncuik, badan tabuang baitu sajo. Badan nan indak di pandang lai.

    Nan untuak sakali nangko inggan itu sajo daulu, di minggu muko atau minggu katibo akan kito cubo manyurah ampek nan lainnyo. Apokoh ampek nan lain tu, basaba dunsanak dulu. Kito cari pulo bahannyo inggan ari kamih katibo. Wassalam. *Dosen Sastra Minangkabau Unand