×

Iklan

CARITO MINANG
Rarak Gigi Ajis Tenjak Tigo Buah dek Diungkik Mantari

02 Apr 2021 | 17:13:08 WIB Last Updated 2021-04-02T17:13:08+00:00
    Share
iklan
Rarak Gigi Ajis Tenjak Tigo Buah dek Diungkik Mantari

Oleh: ALWI KARMENA


Adolah Ajis Tenjak, bujang lapuak panjago sikolah dasar  di Kampuang Baru.  Gaek bana alun, mudo lah talampau. Lah lamo iduik mambujang. Hujan paneh, sakik sanang ditangguang surang. Yo lah pajak lah mati, saku balubang. Lah tigo hari ko maidok maharang-harang sakik gigi. 

    Maleh baruek ka Puskesmas, inyo pai mangadu ka Mantari Dotor, urang nan nyo picayoi.

    Sakik gigi si Ajis Tenjak ko manjadi-jadi tangah malam buto. Raso ka malatuih sampai ka banak.

    Indak tahan lai, malam tu juo,walau lah hampia satangah duo, mamakai senter ketek,  nyo pai maongkok-ongkok ka pondok Mantari Dotor. 

    "Angku Dotooor angku dotooor..oiii...  ondehhh. bukak lah pintu. Waden ka mintak tolong. Tolong lah wakden angku dotooor..oiiiii  sakiiiik bana." katonyo maratok di pintu Mantari Dotor.

    Mantari Dotor tasintak dari lalok. Jo basunguik-sunguik di bukak an nyo pintu,

    "Dek aaa?" tanyonyo sambia manggosok gosok matonyo.

    Ajis Tenjak duduak manjalepok di lantai. Tangannyo mamacik pipinyo nan sambok dek sakik gigi.

    "Aakiiik gigii den dotor......akiiik banaa.  Cabuuik gigi den ko  tor... cabuiiik. Indak talok di den manahan. Raso nyo cabuik banak jo jantuang den.." ratok Ajis Tenjak.

    Mantari Dotor tatagun mandanga. Inyo iyo manggaleh ubek. Inyo iyo dipicayoi urang angku doto sagalo pandai.

    Tapi, mancabuik gigi?  Salamo dunia takambang, alun sakali juo nyo cubo.

    Manulak atau mangecek an indak bisa, malu inyo ka Ajis ko.

    "Ndeehhh  jo aaa lah kadicabuik ko?"

    Untung takana di dalam tong paragaik tukang ado tang pancabuik paku. Diambiaknyolah tang nan bagomok gomok dalam tong pakakeh tu.

    "Nnaaahh....Jis,  co mangango...lah... nak dek bucuik gigi tu," keceknyo ka Ajis nan masih bakaluak-kaluak kasakitantu. Tapi dek sakik, jo mangango pun ndak samparono doh, saketek sajo muncuang nyo tabukak. Tabik lo raman-raman Mantari Kacau ko dibueknyo.

    "Ngangoanlah arang tu gadang-gadang. Nan ma nan sakik?" kecek  Dotor Mantari sambia mamacik tang jo senter. Hati keteknyo marutok-rutok dek laloknyo tagaduah.

    Ajis mamgango sambia tatap maharang.

    Malam agak dingin cahayo senter galok.  Ajis mangango. Baun arangnyo mahawo bacampua baun patai jo cik ayam, sabana naiak paruik Mantari Dotor dibueknyo. Mako jo sampik hati Mantari Kacau mamasuak an tang jo obeang ka muncuang Ajis.

    "Sabalah kama go gigi nan sakik?" hariak Dotor.

    "Caca bbalaah haaltreehhhmm," jawek Ajis masih maharang. 

    Tang masuak. Obeang masuak. Senter galok.

    Jo hati nan kesal sarato sundek Dotor nanyapik gigi sabalah kateh. Nyo huik. Nyo cukia. Nyo tunja. 

    "Kraakkks. Krakkks........" tadangan badaruak co karupuak. Ajis tararau.

    "Haaaawwww haawwuuuaaaahh. Hatiii Deen.....tor," cebeknyo. Kantuiknyo pun badantam duo kali dek manahan sakik.

    Ajis taluluang. Duo antah tigo gigi sabalah ateh tabongka  Tamasuak insang tabao. Tang pancabuik paku lah namonyo. 

    Ajis tagolek. Pamandangannyo kalam . 

    Sakik allahurabbii. Tigo gigi nan indak balubang tacabuik. Samantaro gigi nan balubang nan sajak kapatang mangantak-ngantak...tatap di ureknyo. 

    Ajis pansan. Karayia ketek jo karayia gadangnyo tapanca di sarawa. 

    Angku Mantari Dotor ilang aka. Dijagoan indak tajago. Disiram jo ayia alun juo sadar lai. Lah subuah baru nyo manggarik.

    "Alamdulillaaaahhh. Lai iduik nyo...Alhamdulillah,"  bisiak Dotor mahapuih paluah. Tabayang dek nyo pulisi kamanjapuiknyo kok nyampang tajadi nan bkan-bukan jo si Ajis Tenjak ko.

    Ndak lamo sudah tu Ajis duduk.

    "Ndeh, dotor, joa lah kadibaleh jaso dotor ko, yo lah ilang sakiknyo tor, tarimokasih," keceknyo sambia menyorongan pitih saribu tigo buah nan bulek-bulek tu. 

    Nan Mantari Kacau juo binguang, nyo tahu bana bahaso nan dicabuiknyo tadi malam tu bukan gigi nan sakik. Tapi gigi nan indak sakik, kini si Ajis mangaku lah cegak. Kan yo ajaib tu. Galak surang sajo Mantari Kacau tu.

    "Ndak usah lah, baok sajo lah pitih ang tu, den manolong sajo. Tapi ......"

    "Baa lo lai Ngku?"

    "Tapaso ang ndak buliah makan nan kareh-kareh dulu, makan nan lunak-lunak, bubua, jus. Jan nan basantan-santan," kecek Mantari Kacau ko. Itu takana sabanta ko se tu nyoh dek Mantari, supayo ndak jaleh na main nyo dek si Ajis. Nan si Ajis Tenjak ko yo lah haqul yakin bana baraso kapandaian Mantari Kacau ko sabana santiang, sabana tenggi alemu nyo.