×

Iklan

CARITO MINANG
Pirin Tengang ka Istana Jokowi

31 Mar 2021 | 09:37:23 WIB Last Updated 2021-03-31T09:37:23+00:00
    Share
iklan
Pirin Tengang ka Istana Jokowi

Oleh: ALWI KARMENA


Pirin Tengang nan tasabuik gadang garetang ko mandapek ganjaran. Itu dek ulah asa kamalompek. Malompek ambu ambu, malompek bada. Ambu ambu malompek  jo sisiaknyo, kamalompek an bada. Nan bada indak tau di untuang…. Awak malompek, lansuang masuak ka muncuang ambu ambu.

Inyo mangaku urang penting. Tim pemenang inti. Inyo maraso dirinyo bajaso bana mamanangkan calon Presiden.

    “Kampuang Teleang, wakden nan maarahkan. Lapan puluah parsen suaro awak disitu. Kampuang Suduik, namo deyen den jua. Dapek tujuah puluah limo parsen.  Kampuang Tangah, wakden bana nan turun. Sambilan puluah parsen  awak manang disinan…” baitu Pirin mahota balapia lapia di lapau One.

    “Kok baitu, bao baolah kami kalau Apak tu lah duduak nantik” solo si Tonek mamanciang.

    “Waang kapatang mamiliah sia…?” tantang Pirin manunjuak iduang Tonek.

    “Ehhh ? Aden buliah di pareso lua dalam. Awak samo, kan?”

    “Kalau baitu, oke. Bisa  den catat namo waang. Tapi, aden indak bajanji bana doh. Barayia sarawa nan di ateh, lambok sarawa nan di bawah…”

    Baitu gaya si Pirin hampia ka sado kawan mangecek. Inyo adolah urang pantiang. Tim Sukses. Tim Pemenang Inti… Tapi, nan mangecek tu inyo surang sajo. Urang indak panah maliek baa inyo bakarajo jadi Tim Inti tu doh.  Gadang karuah pado lalok.

    Baitulah, katiko hari kamangan tibo. Apak nan disabuik sabuik Pirin kadilantik, diresmikan di Istana. Indak tabado honjak Pirin doh. Angek dandang pado tungku. Urang baru rapek rapek manyusun namo namo nan ka pai…Pirin lansuang maukua jas. Nan sabanannyo, namonyo indak tacantum dibao pai. Tapi, itu pantang dek inyo. Indak mangecek ka suok jo kakida. Indak batanyo jo baiyo jo panitia. Jas puitiah putiah bantuak pakaian resmi gubernur nyo buek pulo sapasang.

    Agak sakik hatinyo, dirinyo indak dibao urang baiyo, Namonyo indak ado dalam daftar urang nan ka pai. Tapi, dek malu,  sakaligus malagak ka urang. Inyo maukua Jas,  nyo caritokan kasiapannyo  ka lapau lapau.

    “Tapaso pai awak…ka istana, Nyo sasakan dek Gubernur…Basuo jo  Joko Wi…Megawati..Je Ka, Kumolo…Yo awak harus pakai jas resmi…”

    Hari pelantikan tibo di minggu muko. Saratuih urang rombongan, Nan namo Pirin indak ado tamasuak doh. Tiket pesawat pas saratuih buah. Pirin indak amuah tatingga. Malu inyo beko jo urang urang tampek inyo bacarito salamoko. Nyo barangkek jo oto. Dek karicih  travel maha haragonyo, nyo manumpang naiak bus umum. Tapi duduak di CC subalah sopir palang di muko.

    Untuak mampalagak an sia dirinyo, di ateh oto juas putiah tu lah lansuang nyo pakai. Sopir batanyo, sopir nyo hao. Sitokar batanyo, sitokar nyo kolak. “Wak den pai pelantikan Gubernur…” baitu pangakuanyo agak manyombong. Urang antaro picayo jo indak. Tapi nan  Pirin mangecek jo parasaan.

    Jalan darat, hari ujan  oto acok pulo boco ban. Hal hasil, jalan ka Jakarta nan biaso duo hari…manjadi tigo hari. Jas putiah nan bakanak an dari Padang tu, kini lah balunau.. Jajak rokok,. Jajak gomok. Jajak minyak samba.

    Pirin pakai jas putiah.

    Nan sabananyo, manjaik baju jas putiah jo ka Jakarta ko, dek Pirin hanyolah gengsi, pailangan malu. Jan kecek urang awak ndak tabao. Sabananyo –Iyo ndak tabao. Tapi, jan tau bana urang. Awak lah payah mahota kian kumari. Bahaso diri awak ko urang penting. Tim Inti Sukses. Tim Pemenang.

    Urang naiak kapatabang. Pirin naiak Bus indak ba AC. Tapi, duduak di CC. Lai samo ado pakai C. Duo hari tigo malam batanggang jo sopir.. Mahota tatap manggadang. Ka sopir oto inyo mangaku diundang lansuang dek pak Benur jo Joko Wi bagai. Bahkan, Komandan Paspampres mamasan dirinyo.

    “Awak ndak buliah mangecek-ngecek kumuah di istana doh…bacaruik…sakali jangan. Berang Mbak Mega….” Baitu inyo maloge sopir. Nan sopir, asa lai ka ado kawan mangecek, diiyokannnyo sajo curito Pirin.

    “Kenal Joko Wi jo Apak…?” tanyo Sopir antaro iyo jo indak.

    “Heh Heh…sagan ambo mangecek….batu cincin nan liaw pakai tu ambo maagiah. Lumuik Suliki asli…”

    “Oh yo? Bilo Apak basuo jo Joko Wi?”

    “Alun lamo ko lai…kutiko inyo kasiko. Basuo di lapau nasi…Awak mambali rokok…liaw mambali rokok pulo…Awak maagiah api katiko baliau kamanduduik paisok”

    “Heh heh Iyo santiang Apak…Tolong sampaikan salam kami ka liaw…” kecek Sopir sambia kuok.

    Oto bajalan. Hari bajalan. Subuah tanggal duo baleh, Pirin lah mancari oto. Kok taksi maha bana. Nyo bae naiak ojek. Dari Rawamangun ka Istana Merdeka kanai limo puluah ribu. Indak taraso maha, dek karano sopir ojek tu takuik ka Pirin.

    “Ke Istana  ah..yang bener Om…. Ntar saya ditangkap…ojek kaga boleh ke sana Om…” kecek si tukang Ojek.

    “Kamu aning saja. Tanang. Saya yang kecekkan ke Paspamres…bebas kamu…” gertak Pirin.

    “Aduhh..maaf…terimakasih…terimakasih…ya... ampun…si Om…”

    “Ndak peralu mintak ampun…Yang penting, kamu antar ambo sampai-sampai ke Joko Wi… Aman…”

    Maliek baju nan dipakai Pirin, agak picayo juo tukang ojek tu. Walau baju tu lah gak kumuah, tapi..jas putiah. Jarang urang mamakai jas putiah naiak ojek. Sakali ko baru. Ka basuo jo Joko Wi pulo curitonyo.

    Nan dicamehkan tukang ojek, iyo tasuo. Di ujuang jalan Merdeka Barat tu sajo ojek lah diambek dek pulisi jo PM.

    Pirin turun jo lagak tatap manggagah. Dibayianyo pitih ojek, nyo bae malangkah jalan kaki ka dakek istana.

    Dari lua taliek urang urang iyo rami. Turun jo sedan bakilek-kilek. Pakai jas jo pakai batiak. Pirin pakai jas , karano tu picayo dirinyo naiak.

    Tapi, ka masuak paga istana, undangannyo ditanyo dek patugeh.

    “Maaf. Tolong perlihatkan undangannya Pak…” tanyo patugeh bahelem putiah. Pirin tasuruik. Undangan apo pulo nan kadiliek kannyo koh?

    “Amba Tim Sukses…Amba langsung dari Padang. Ndak terkejar bawak undangan…tapi amba diundang…basumpah amba. Amba tokoh masyarakat. . Kalau ndak picaya…tanya lansung pak Gubernur…”

    Patugeh tu antaro mangarati jo indak nan dimukasuik Pirin. Tapi  nan jaleh, Pirin dilarangnyo masuak. Indak tabado malu jo berangnyo tumbuah. Jauah-jauah dari kampuang, mamakai jsa putiah. Kini di istana…awak diambek urang.

    “Ooo. Pak… Pak…” imbau Pirin ka patugeh nan kini indak maacuahkan dirinyo tatagak di lua paga lai.

    Patugeh tu mancaliak acuah tak acuah.

    “Pak…Manumpang berkodak bulih pak…?” sorak Pirin dari lua paga istana. Di tangannyo ado HP ngenek nan bakabek jo kajai tapi lai pakai kamera, dibao dari Padang. Patugeh nan diimbau tibo. Dek ibo nyo tolong juo si Pirin mangodak.

    Pirin tagak pinggang di laman Istana.

    “Tarangan saketek Pak…Kadibawa ka kampung poto ini mah…” kecek Pirin mampaelok tagak.

    Klik Klik. Duo patiak. Kaduonyo Pirin tampak di layar HP.  Potoko lai tarang. Tapi Istana nan dibalakangnyo indak jaleh. Nan tampak Pos panjagaan.

    Itulah kini, poto nan dibao-bao Pirin ka kawan-kawan di Padang. Poto tagak pinggang di muko pos panjagaaan. Indak saketek juo ado tando-tando di istana doh. Pos panjagaan ko, dimano-mano samo. Nan istana hanyo ujuang dindiang balakangnyo sajo nan tampak. Tapi, Pirin basikareh bacarito, bahaso inyo diundang ka istana. Iko Poto bukti inyo lah sampai di halaman balakang istana merdeka.