|
| Boy Lestari Dt Palindih |
PADANG, Khazminang—Indak lamo kito di Sumatera Barat (Sumbar) ka mamilih pamimpin, baiak di tingkek provinsi mau pun babarapo sarato kota. Sabalun alek gadang dan ka dilangsuangan bulan Desember 2020 tu dilangsuangkan, tokoh adaik jo ugamo di Sumbar H Boy Lestari Dt Palindih indak lupo maingekan masyarakaik daerah ko.
Kecek angku datuak ko, dalam maso ka manampuah Pilkada di Sumatera Barat, tarutamo dalam parsiapan mamiliah calon pamimpin, sabuiklah mamiliah calon gubernur, kito di Ranah Minang ko haruslah sabana bijaksano, hinggo mandapek pamimpin nan sabana mangarati baa sabananyo kainginan Sumatera Barat, daerah nan marupokan nagari bapaga adaik jo ugamo.
Pamimpin nan kadipiliah, kato angku datuak manambahan, adolah urang nan sabana manjalankan ugamo. Sabana barasiah lua jo dalamnyo. Lahia jo batinnyo. Indak baugamo karano politk doh. Nyo jua politik babungkuih agamo.... Iko cilako nagari dibueknyo.
Kalau sakadar bungkuih. Jan mudah tapadayo. Diliiek, di baliho-baliho, poto-poto calon pamimpin nan mampagelehkan dirinyo agar manarik simpati urang. Kasadonyo mamakai kupiah. Kasadonyo mamakai baju taluak balango. Kasadonyo bakain saruang nan basandang di kuduak. Kasadonyo galak tasengeang ramah bantuak urang elok laku.
“Aaa tu ? Tantu inyo nio mangasankan bahaso inyo urang nan saliah. Tau jo ugamo. Tau jo alua sarato patuik. Pakaiannyo sopan, galaknyo ramah sarato tampan. Itu pado hakikatnyo hanyo sakadar bungkuih,” kecek angku Dt Palindiah ko.
Pado dasarnyo...antahlah. Isuak kalau lah duduak. Lai koh inyo balaku sarupo alimnyo pakaiannyo ? Kain saruang jo kupiah tu, lai bapakai ka musajik ? “Antahlah. Antah untuak maumpan paratian. Inyo tau ranah Minang ko, nagari nan sangaik Islami. Beko, kok lah duduak, mungkin kain saruang ko tingga di lamari. Awak lah bakencak bak kato awak. Pisau lah di tangan, Atimun lah di tangan. Indak ado raso jo pareso lai,” kecek datuak kito ko.
Pamimpin kito kecek liau manambahan, haruslah urang nan punyo hati nurani. Urang nan mamimpin di ranah Minang, dari partai apo sajo, dari golongan apo sajo. Jadi, gubernur nan sabana Sumatera Baratlah, jan jadi Gubernur Partai. Nan dilayani dan disalamatkan hanyo urang-urang sapartai. Nan lain – ambek cah.
Pamimpin nan mamakai hati nurani, tau jo sakik rakyat. Bisa maapuih ayia mato rakyat. Susah rakyat adolah susah dirinyo lahia batin. Indak basandiwara doh. Icak-icak sato susah. Di balakang, galak takakah kakah. Itu urang nan indak bahati nurani tu doh. Indak paralu dek Sumatera Barat doh. Kok kajadi gubernur juo, kalua lah. Jadi gubernurlah di lua daerah nan batuahko.
Salamoko, banyak ilia ayia nan tasumbek lah taganang. Banyak rantiang patah dek kanai lajang jo tarajang. Rakyaik maaduah, maratok atau maharang. Pamimpin diharok kaditompang, maangguak angguak duduak mambalakang.
Makonyo kecek angku datuak ko maingekan, sakali lai piliah banalah urang nan diyakini sasuai kato jo parbuatan. Jan dek karano bareh sagantang. Kain saruang atau sahalai kain panjang. Tapiliah urang nan sarupo “Rajo Angek Garang”, disapo nyo mambulalang. Dikritik, inyo mangarengkang. Diundang buruak bayiak, inyo indak datang. Namuahnyo hanyo ka urang sapartai atau sakandang.
“Piliahlah pamimpin nan lamak di awak, katuju di urang,” kecek angku Dt Palindih maingekan masyarakaik. (Alwi Karmena)
