|
Raso jo Pareso Indak Ado
Oleh : Tan Ambo
Dek teknologi tinggi kiniko
Sasuai kamajuan maso
Banyak parubahan tasuo
Tamasuak di adaik jo budayo
Diambiak salah satu conto
Dalam iduik barumah tanggo
Antaro mintuo jo rang sumando
Suasana kini jauah bedanyo
Zaman dulu kalau dibaco
Kaduo ranggaek anak daro
Kalau manyapo urang sumando
Salalu manyabuik galanyo
Di Piaman tadanga dek kito
Sidi, Sutan atau Bagindo
Jo itu rang sumando disapo
Ka minantu atau laki anaknyo
Tapi kini acok tasuo
Urang tuo ka minantunyo
Tamasuak kakak anak daro
Ka sumando maimbau namo
Kabiasoan caro iko
Minantu kurang baharago
Basamoan jo urang biaso
Disiko indak pado tampeknyo
Adaik niniak mamak kito
Sajak zaman dahulunyo
Batinggakan baitu sajo
Kini luntur dimakan maso
Lah tingga raso jo pareso
Raso jo pareso indak lai ado
Diateh rumah sadonyo samo
Minantu ka mintuo baitu pulo
Dulu kalau minantu tibo
Ka mintuo ayah bininyo
Jo sikap santun manyapo
Indak langsuang masuak kamarnyo
