|
| Bahren |
Hari Rabu tanggal 9 bulan Desember tahun ko kito di Padang sarato puluhan atau labiah dari saratuih kota jo kabupaten di Indonesia ko ka pamiliahan umum. Baik nan namonyo mamiliah Pak Gubernur, Pak Wali atau Pak Pati. Tantu sajo sabalunnyo alah pulo diadokan babagai bantuak acara dek calon-calon nan kamaju tu untuak mandapekkan suaro dari kito nan ka mamiliah.
Pihak dek KPU nan batugeh malaksanakannyo pun alah baupayo sarato bakarajo sakuaik tanago supayo alek pemilu ko bajalan lancar inggo salasainyo proses maetong suaro, sainggo didapeklah kaputusan sia nan kaduduak untuak manjadi apo, antah gubenur lah ko, anah wali atau pak pati.
Limbak nan dari pado itu, pihak KPU pun agaknyo alah pulo maadoakan acara debat atau samacam curah pikia masiang-masiang calon ko, a nan kadipabuek dek liau-liau ko nyampang tapiliah untuk maso limo taun ka muko. Babagai-bagai program jo janji-janji lah kalua dari muluik manih bak tanggoli masiang-masiang calon lakik inyo tapiliah. Antah kok lah duduak isuak mulai lupo jo indak tau, mudah-mudaha sajo indak tajadi nan bak kian.
Kito caliak pulo tipak di pihak nan karajonyo mangawasi jalannyo proses pamlihan ko. Alah pulo puluhan kasus nan malangga aturan nan dibuek dek Bawaslu, baiak aturan wakatu kampanye, aturan alaik-alaik parago kampanye. Kok dikumpua-kumpuakan mungkin alah pulo sagudang banyak e nan diaamankan dek Bawaslu ko, inti dari kasadonyo nan dipabuek dek Bawaslu supayo cito-cito pamilihan nan jujur jo adil ko talaksana.
Kini, baa dek kito lai, nan kamanjadi urang-urang nan ka kamiliah. Kok apak-apak dari KPU jo Bawaslu alah bakarajo kareh untuak manyukseskan pamilihan ko. Mako salayaknyo lah kito-kito nan lah tadaftar di Daftar Pamiliah Tetap ikuik pulo sato sakaki dalam alek ko.
Di tanggal nan lah ditatekkan dek pamarintah ko tanggal 9 Desember ko molah kito barami-rami datang ka TPS (Tampaik Pamugutan Suaro), tantu sajo dangan tatap patuah sarato taaik jo protokol kasehatan nan lah di alo-aloakan dek pamarintah sajak tigo sampai ampek bulan nan lapeh. Baa bana caro sarato aturan dalam pailihan nan sakali ko. Salain itu, molah kito manjadi pamiliah nan cerdas, pamiliah nan indak bisa diagak agiah dek para calon, karano bak kato-kato ustat somat, katiko awak dalam biliak suaro tu untuak mamiliah aratinyo wakatu itu kito alah manjadi saksi untuak urang nan kito piliah nantun.
Mudah-mudahan kito bisa mandapekkan pamimpin nan sabana-bana sasuai janji kampanye jo nan dibueknyo wakatu lah duduak isuak. Semoga… aamiin. n *Dosen Sastra Minangkabau Unand
