×

Iklan


Mancilok Pitih Masajik, Paja Galene tu Disuruah Batobaik

28 Oktober 2021 | 21:31:38 WIB Last Updated 2021-10-28T21:31:38+00:00
    Share
iklan
Mancilok Pitih Masajik, Paja Galene tu Disuruah Batobaik
Iko hanyo foto icak-icak je nyeh, dari pado berita ko indak bafoto pendukuang.

Bukittinggi, Khazminang.id—Kok ditangkok no, ano rang awak. Kok dak ditangkok no, ano panciluik. Bantuak itu kiro-kiro simala kamo kajadian nan dialami dek pangurus Masajik Jihad Tangah Jua, Kota Bukittinggi katiko manamui anak jolong gadang banamo icak-icaknyo Yuang Narun (18 tahun) katiko mancilok pitih masajik nan ado dalam kotak amal, Rabu 27 Oktober 2021.

Karano mancilok tu batantangan jo agamo, apolai nan dicilok tu pitih masajik, akianyo pangurus Masajik Jihad Tangah Jua tu mamutuihan manahan samantaro anak jolong gadang tu.

Katiko dipareso dek rang rami, tanyato di tangan sarato di pinggang paja “anyia” ko tasuo jimaik, nan dikabek jo banang tujuah ragam.

Katiko ditanyokan dek pangurus Masajik Jihad Tangah Jua tu, paja galene ko mangaku paralu pitih untuak iduik di Kik Tinggi karano baru sapakan ko tibo dari kampuangnyo di Palembang, Sumatera Selatan.

Untuang sajo pangurus Masajik Jihad Tangah Jua ko maambiak langkah bijaksano dengan manampuah jalan bakoordinasi jo aparaik dari Polres Kota Bukittinggi Aipda Roni nan ditempatkan sabagai Bhabinkamtibmas Kalurahan Aua Kuniang.

"Dari pengakuannya, pelaku masuk masjid sekitar jam 02.00 WIB, saat beraksi ketahuan oleh penjaga masjid dan langsung ditangkap, dari tangannya didapati berbagai macam kunci dan jimat yang menurutnya sebagai pengaman saat beraksi," kecek Aipda Roni manjalehan ka wartawan.

Satalah mampatimbangkan raso jo pareso akianyo pihak Kepolisian sarato pangurus Masajik Jihad Tangah Jua tu akianyo manampuah langkah kekeluargaan.

Akianyo paja galene nan mancilok pitih masajik tu diminta untuak batobaik sarato bajanji indak ka mangulangi parangai buruaknyo tu.

"Hasil kesepakatan dengan pihak masjid, pelaku diminta bertobat dan berjanji tidak mengulangi perbuatannya, jika ia melanggar, pengurus akan melaporkan ke Kepolisian karena sudah memegang bukti," kecek angku Roni ko manjalehan.  (Febriansyah Fahlevi)