×

Iklan


Lidah Mintuo Lah Dipagelahan dek Urang

03 Desember 2020 | 16:58:18 WIB Last Updated 2020-12-03T16:58:18+00:00
    Share
iklan
Lidah Mintuo Lah Dipagelahan dek Urang
Iko nyo a lidah mintuo nan mambuek urang galingaman untuk mampalagakan di rumahnyo. Haragonyo indak singaik pulo mahanyo tu doh !

PADANG, Khazminang—Tanyato di musim pandemi Covid-19 ko lidah mintuo sangaik baharago sarato maha balinyo. Lidah mintuo nan banamo latin sensevieria ko maha haragonyo karano bisa dipakai kauntuak mambarasihan udaro kumuah di dalam ruangan.

                Indak sampai di sinan se doh, lidah mintuo ko kecek urang santiang, bisa pulo maisok 107 baragam racun nan batabangan di alam lapeh.

Sayang sangenek, samantang lidah mintuo ko sajak saisuak alah ado, tapi baru sajak pandemi Covid-19 ko tanaman hias tu banyak dicari dek urang kauntuak dipalagakan di rumahnyo. Bahkan kini manjadi primadona di mano-mano !

    Kecek urang santiang lo, sampai kini tacataik 70 macam bantuak jo rupo lidah mintuo (sansevieria) ko, ciek diantaronyo nan baharago maha adolah lidah mintuo jenis sansevieria stuckyi.

    Urang santiang tu mangecekan, sansevieria stuckyi ko marupoan jenis lidah mintuo nan paliang banyak ragam bantuak jo ruponyo, adoh nan lidahnyo pendek, bulek sarato nan bantuaknyo panjang sarato tagak luruih.

    Salain tu, lidah mintuo nan bajenis sansevieria stuckyi ko punyo ciri khaih warna daun nan ijau kalam langkok jo tekstur nan kasa sarato bagarih-garih warna pucek.

    Salanjuiknyo di dalam daun lidah mintuo sansevieria stuckyi ko adoh pulo badaging taba nan barisi gel layaknya tanaman lidah buayo, dimano tabanyo bisa mancapai 10 mm, bahkan labiah dari pado itu.

    Indak itu sajo doh, tinggi daun sansevieria stuckyi dapek pulo tumbuah hinggo 2 meter labiah, tagantung ka cahayo matahari sarato kalembaban udaro nan didapeknyo.

    Diantaro ragam nan dipunyo dek lidah mintuo bajenis sansevieria stuckyi ko, tanyato ado pulo nan langka atau jarang tasuo. Sahinggo kalau adoh nan manjuanyo, haragonyo pun indak singaik mahanyo doh !

    Kecek urang santiang, kini ko ado limo macam lidah mintuo nan langka tu dijua maha dek urang, yaitu sansevieria bagamoyensis, star sansevieria kirkii, sansevieria stuckyi, sansevieria ehrenbergii sarato nan bajenis sansevieria elensis.                 Maliek kanyataan ko, bagi nan baminaik ka mampagalehan lidah mintuo, mako dari kini patuik-patuiklah lidah mintuo tu dek awak surang-surang. Untuang-untuang kok ka lai adoh jalan rasaki dari lindah mintuo tu. (Febriansyah Fahlevi)