×

Iklan


Kutang Mintuo Manyalamaikan Minantu dari Razia

05 April 2021 | 10:45:07 WIB Last Updated 2021-04-05T10:45:07+00:00
    Share
iklan
Kutang Mintuo Manyalamaikan Minantu dari Razia

Oleh: ALWI KARMENA

 

Manjalang puaso ko, pangawasan untuak mahambek panularan pandemi covid-19 sabana diperketat. Larangan kareh bakumpua, wajib mancuci tangan sarato wajib mamakai masker ditagakkan jo sanksi hukum.

    Untuak managakan paraturan tu pamarentah sabana indak ado tulak ansua. Sia sajo nan malangga, kalau kadaptan lansuang di agiah tilang.

    Pulisi, tantara, hansip, satpol PP diturunkan bajago jago. Razia hampia tiok hari. Di simpang- simpang, dipareso tarutamo soal badisiplin mamakai masker. Sia sajo nan kalua  rumah, bayiak bakandaraan maupun bajalan kaki, wajib mamakok iduang jo arang atau muncuang jo masker. Maskernyo sabana harus mamanuahi  syarat.

    Sia sajo nan indak mamakai, dihukum di tempat. Didando, sudah tu disuruah manyapu jalan. Indak ado ampun.

    Hari Salasa kecek urang hari paneh nan banyak halangan. Itulah hari babagai halangan nan mananimpo Munir Kuncuang sakaluarga. Sabana babahala. Padohal hari tu Munir sadang maraso naiak daun  dapek mamakai oto adiak. Rancana malagak mamambao bininyo si Nurunis sarato mintuo Tek Kena amak si Nururis balanjo ka pasa raya.

    Ndak tabado gadang hati Tek Kena dibao minantu jo oto. Batigo di ateh oto pribadi  sabana raso disayangi anak jo minantu Naiak lah oto batigo tigo, bapakai baju nan gak rancak. Rancana masuak pasa raya dari arah bioskop Raya,  balanjo di Trendshop nan baru di simpang Rio tu.

    Urang ka puaso, yo tapek bana balanjo. Sia tau bisa sakalian bali baju rayo. Oto bajalan, hati taraso mambang.

    Hehh? Di simpang ka masuak pasa ado razia. Razia Masker.

    Cilako. Kabatulan masker nan ado hanyo ciek. Munir cameh, masker ciek? Dari ateh oto nampak urang-urang di muko ado nan kanai tilang dek indak mamakai masker. Disuruah manyapu jalan. Ondellhh baa aka? Masker nan ciektu untuak manyalamatkan si Nururis. Tek Kena jo Munir apo aka?

    “Mati kito. Tatangkok kito. Kok kababaliak, jalan porboden. Ka dibali...indak ado urang manjua. Mati kito. Baa lah aka kooo?” kato Munir.

    Kadisuruah urang manyapu, Tek Kena Jo Munir sabana malu.

    “Baa aka Mak. Baa aka lai?”

    Tek Kena indak ilang aka tampaknyo.

    “Katapian oto saketek,” parentah Tek Kena.

    “Baa mangko baitu Mak?”

    “Katapian se lah capek”

    Munir mangatapian oto. Nan si Nururis lah dipakaian masker nan ciek tadi.

    “Baa lai Mak?” tanyo Munir co urang andia.

    “Piciangan mato!” parentah  Tek Kena bantuak parentah pulisi.

    Munir tatagun.  Aaa pulo koh?

    “Jan mancaliak caliak ka balakang,” tambah Tek Kena mamarintah. Munir patuah, walau pangananyo agak binguang.

    Dari balakang tadanga bunyi badarak darak.

    “Apo koohhh?”

    Tek Kena nancukia bahunl minantunyo

    Diadokan nyo Kutang. Kutang lambok nyo bana nan dipakai tadi.

    “Potong duo ko. Kito pakai sabalah surang,” kecek Tek Kena.

    Munir talonjak. Kutang barendo masih lambok dek paluah tangah hari. Itu nan kadipakai sabalah surang?

    Kok dari bantuaknyo.Yo lai pas bantuak masker. Ado tali nan bisa dipakai.

    Gadangnyo Iyo pas. Ukuran Tek Kena nomor 38...lakek sampai ka daguak.

    Pas. Yo pas. Saaalah surang minantu jo mintuo. Kutang barendo masih lambok. Baunnyo indak paralu disabuik. Tapi lah manyalamnaikkan urang batigo ko dari razia masker.  keh keh keh.

    Pasan ambo: kama pai, sanak jan lupo mambaok masker, pado tangga lo kutang mintuo beko.