×

Iklan

CARITO MINANG
Katua Onggok Didaram Ahok

31 Maret 2021 | 08:37:23 WIB Last Updated 2021-03-31T08:37:23+00:00
    Share
iklan
Katua Onggok Didaram Ahok

Oleh: ALWI KARMENA


Basuruik carito saketek. Walau basuruik sinan juo. Tantangan si Onggok alias Ketua ko, daulu taun taun salapan puluah, inyo  iyo panah jadi Ketua di Balakang Tangsi. Katua Rundo. Inyolah tukang jalankan surek panggilan rundo ka urang urang nan batugeh. Katua panggilannyo dek urang kampuang.

    Mandapek tugeh rundo, urang banyak nan maleh.  Tapi, dek si Onggok ko,  ado juo urang tampek inyo balanteh angan. Iko nan mambuek inyo candu. Lanteh angan ka urang bodoh.  Urang tu  nan acok nyo agiah tugeh rundo malam. Namonyo si Hok Dang Boya. Paranakan Cino,  tapi dek andia, Hok  tasisiah dari kaluarga.

    Ka si Hok ko, Katua sabana mangareh taruih. Kareh siang, kareh malam. Kadang kadang, sakali duo hari nyo suruah pajako rundo. Si Hok Dang Boya ko patuah ka Ketua. Sabab, inyo takuik bana kalau Katua ko maampok kalahmahannyo. Nan tak lain jo tak bukan kampia garamnyo. Sakiiiik rasonyo…ditapuak Onggok.

    Uncang-uncang si Hok terkenal di Balakang Tangsi. Makonyo namo paja boleang ko, nan tadinyo si Hok sajo, nyo tambah jo Dang Boya dek urang,.. Nan inyo amuah pulo diimbau sarupo itu.

    Salain rundo, si Hok ko acok disuruah urang jadi tukang bongka. Mulai dari tukang bongka kakuih, tukang bongka rumah, tukang bongka barang-barang. Karajonyo iyo capek. Dari situ inyo mandapek pitih untuak balanjo. Yo baa lai…? Dunsanak sasamo Cino indak mamparatiannyo. Dikarajoannyolah karajo nan indak dikarajoan urang.

    Makonyo, kutiko kamanakan Katua manyabuik namo A Hok, tabayang dek si Onggok ko…si Hok Dang Odok alias Dang Boya.

    Lah yakin bana inyo, sabab, sajak taun lapan puluah ka abih, si Hok ko pindah ka Jawa. Namo Hok ko adolah namo tampek inyo balanteh angan. Mandanga ado namo A Hok kamaruntuah-runtuah, tabayang dek si Onggok Ketua,  kapalo botak si Hok jo pisak sarawanyo nan tempang sabalah kida.

    “Si Hok yo… ?  Lah jaleh takuik inyo ka wakden mah…” baitu kato ati si Onggok. Manolong kamananakan, sakaligus mampaliekan pangaruah lamonyo ka si Hok. Urang lain buliah nyo runtuah. Tapi, kamanakan den… jan digaduah… Den tapuak uncang uncangnyo…mamakiaknyo mah,” sambia mangecek Onggok siap mental barangkek.

    “Jo Si Hok…kalian takuik…? Lieklah.  Jo wakden…manakua paja boleang tu mah…Den agiah inyo rundo di Jawa tu beko…”

    Singkek carito.  Tibo di Jakarta, si Onggok dijapuik dek kamanakannyo. Ado juo babarapo urang tokoh masyarakat Kali Jodo mairiang.

    “Tapek bana mamak datang mah…Si A Hok sadang di Kali Jodo marutok-rutok …capeklah mamak den baok…”

    Singkek curito baliak. si Onggok sampai di Kali Jodo. Urang sadang rami. Ado nan maratok, ado nan manangih. Ado pulo nan ka demo.

    Di ateh mimbar di tangah lapang, ado Cino gagah basuaro parau. Kabanyo itu nan banamo A Hok.

    A Hok sadang bangih-bangih…Manunjuak sarato mangkacepa… Dek tagaknyo  jauah, si Onggok manyuruah urang manyampaikan pasan. “Suruah inyo kamari.. kecekan Katua mamimbau…” baitu Onggok manitah. Ka kawan kanakannyo.

    Nan kawan kamanakan lansuang balari lari ketek. Dicucuakannyo badannyo ka nan rami. Di ambeknyo dek Satpool PP urang nan disuruah tadi.

    “ Mau kemana ente…?” tanyo nan bakupiah sirah. Capek dijawek dek nan ditanyo.

    “Ke A Hok…langsung. Guee menyampaikan pesan Ketua…Ketua panggil A Hok,,,”

    “Bener nih…?” tanyo nan manjago gak ragu.

    Tapi dituruiknyo juo si A Hok ka mimbar. Nyo bae babisiak. Tampak A Hok asli ko tacangang. Sudah tu nyo bae manalepon. Mungkin iyo manalepon Katua. Sabanta tu juo ditungokannyo kapalo nan mangecek. “Lu gila ..apa..?” Nan kanai tungokan tasuruik ka balakang. Lansuang inyo mandudu ka tampek si Onggok Ketua.

    Inyo sabananyo wakia komandan Satpol PP. Bagak. Di rangguikannyo lihia baju si Onggok. Ditungokanyo pulo kapalo si Onggok, sudah tu, …...puak pak puak. Tigo lapuak manapiak muko si Onggok. Nan urang lain basuruik. Onggok tasanda ka kurisi. Kamankannyo dek ibo, mancubo manolong. Digusuaknyo pipi si Onggok nan sirah kanai tapuak tu jo minyak sungu badak… Handdeehhh…Onggok manyangko asa ado nan banamo Hok…itu pasti Gadang Boya…Si Hok Padang antah dima. Nan iko A Hok panguasa Jakarta. Pulanglah Mamak bisuak. Mati Mamak disiko beko, guman si kamanakan. Buluih…sabana buluih galeh Katua nan sakali ko.