|
| SADANG DIPARESO - Rang padusi asa Tiongkok banamo Zhu-xiaoyan sadang dipareso dek patugeh dari Kantua Imigrasi Kabupaten Agam. (ist) |
Padang, Khazminang.id—Kalau hanyo kauntuak manyampaikan parasaan sayang baik dari laki-laki ka rang padusi, atau dari rang padusi ka laki laki dalam bahaso Cino, jo kato-kato “wǒ ài nǐ" se salai mah. Tapi kok ka mamareso rang Cino nan talibaik pakaro hukum di daerah kito Sumbar ko, tantu patugeh nan ado agak kalimpasiangan juo dibueknyo.
Saroman nan dikatahui basamo Cino atau dikenal jo Republik Rakyat China (RRC) adolah negara di Asia Timur nan panduduknyo indak singaik banyaknyo doh. Samanjak tahun 2014 nagari tu baganti namo manjadi Republik Rakyat Tiongkok atau Tiongkok.
Kapatang ko Penyidik Kantor Imigrasi Kabupaten Agam dibuek kalimpasiangan mamareso salah surang warga negara asiang (WNA) nan barasa dari Tiongkok ko.
Paja padusi dari Tiongkok ko diamankan Imigrasi Agam di Gudang Pabrik Ice Crem di kawasan Jalan By Pass Pulai Anak Aia Bukittinggi, kapatang. Panyababnyo, paja tu indak bisa mancaliakan dokumen nan sah katiko liau tu dipareso patugeh.
Rang padusi asa Tiongkok banamo Zhu-xiaoyan (40 tahun) tu dipakiraan alah barado di Indonesia semanjak bulan Mei 2021, dengan manggunoan visa kunjuangan industri atau visa nan bakode B211B.
Badasarkan carito nan bakambang, keberadaan WNA ko awalnyo dilaporan dek masyarakaik pak Camaik Mandiangin Kota Selayan (MKS) nan banamo Mihandrik.
Mandapek laporan tu, pak camaik ko indak namuah pulo asa sorong doh, liau pun bakoordinasi jo babagai pihak, diantaronyo Polri, TNI sarato Imigrasi Agam.
Sasudah tu Imigrasi besamo anggota Tim Pengawasan Orang Asing (Tim Pora) di wilayah kerajo Kantua Imigrasi Kelas II Bukittinggi langsuang mandatangi lokasi sarato manggaledah lokasi tu, hari Salasa 9 November 2021, jam 14.00 WIB.
Pakaro ko diakui dek Plh Kapalo Kantua Imigrasi Agam, Indolas Raflesia. Kecek liau ko, samantang pihaknya harus mandatangkan panterjemah untuak bakomunikasi jo rang padusi asa Tiongkok tu, tapi pihaknyo masih malakukan pemeriksaan labih lanjuik takaik jo dokumen keimigrasian paja tu.
“Paspornya ada, dan sedang proses perpanjangan di Jakarta Utara, begitu juga visanya masih berlaku hingga saat ini. Visanya dengan kode B211B itu di masa pandemi bisa digunakan untuk tenaga kerja asing. Hanya saja paspor yang bersangkutan sedang dalam perpanjangan di Imigrasi Jakarta Utara. Kita tidak melakukan penahanan yang bersangkutan, namun masih dalam tahap pemeriksaan lebih lanjut terkait kegiatan WNA tersebut di Bukittinggi," kecek Indolas Raflesia ko manjalehan ka wartawan. (Febriansyah Fahlevi)
