×

Iklan


Dicukua dek Ajo Kuriak

01 Apr 2021 | 11:30:47 WIB Last Updated 2021-04-01T11:30:47+00:00
    Share
iklan
Dicukua dek Ajo Kuriak

Oleh: ALWI KARMENA

 

Katiko masih ketek mudo matah, ambo taetong bujang tampan jo gagah. Pakaian parlente. Dek anak bonsu disayang dek Amak sarato Abak. Pakaian barasiah, basipatu kama pai, jarang batarompah atau basolop.

    Dek parlente ko, ambo acok diagiah Amak minyak arun atau parfum. Satiok ambo bagaua jo kawan-kawan, banyak nan mengecek an ambo baun malaikaik tarampeh. Awak gagah arun pulo. Aaa juo lai?

    Kok bacukua bacari bana tampek nan pandai mahieh rambuik. Kadang ka Tanah Kongsi, ka salon Pria Metropol. Ka Padang Baru. Nan urang tukang cukuanyo sabana tanamo.

    Namun suatu hari, malang nan katibo. Awak tasasak ka bacukua, ka pai baralek resepsi ka tampek kawan. Tukang cukua jo tukang salon langganan, sadang banyak karajo. Ka ditunggu, hari lah hampia patang. Ndeehhhh...Ba aka kooooh? Wakatu tingga tangah duo jam lai. Baa mandi, baa basegeh.

    Di juang simpang ka musajik, di bawah batang kayu ado tukang cukua, Ajo Kuriak galanyo. Jarang urang bacukua ka inyo. Salain alag gaek, Ajo Kuriak ko kurang barasiah. Ambo tau jo inyo. Tapi sakadar tau namo sajo nyo.

    Kok dicubo bacukua jo inyo baa nyo? Awak takaja ka pai resepsi. Harus segeh sa segeh segehnyo. Kurang kurang saketek mode cukuanyo, beko dipelok an lah baliak.

    Sakadar impormasi. Tantangan jo Kuriakko. Urangnyo sabana selebor. Baju karimuak. Sunguik labek. Garembek taba. Nan babahayo...baun katiaknyo. Baun pakuang. Itu alun bara lai. Baun angoknyo. Ondeh, baun bangkai ula. Antah aa lah dimakannyo. Asa mangecek dakek dakek, angok harus di tahan. Kok indak bisa muntah awak.

    Ka inyo ko ambo kaagiahkan badan diri. Bacukua, walau trampeknyo agak tapancia di nan langang, sagan awak kok banyak nan tau awak dipagunda dek Ajo Kuriak.

    Tapi, ba alah. Awak tasasak. Jo langkah barek pai lah ambo ka tampek Ajo Kuriak.

    “Ajo...cukua sangenek Jo...takaja....” kecek ambo jo muko agak masam. Ajo Kuriak tacangang agak takajuik.

    “Haaa...lai amuah juo ka tampek den...he he he. Duduak lah...sero mah di bawah batang kayuko. Angin sepoi sepoi...bisa takalok awak..he he he”

    Ambo duduak mahanyak jo hati nan indak sanang saketek alah juo. Ajo Kuriak mulai mangapak manutuik badan ambo jo kain. Honndeeehhhh. Baun katiaknyo, susah ambo mancari parumpamoannyo. Baun anak bangkai anak kuciang  mungkin labiah bisa di tahan. Antahlah... Ambo piciang ayam mato ambo manahan angok. Tampak sakileh giginyo kuniang indak panah bagosok.

    “Urang gagahko...harus gagah gagah pulo cuakuanyo...”  inyo mangecek...langau ijau mandanguang. Sasak angok ambo manahannyo, sakali-sakali mahiruik juo. Katiko itulah cobaan marajam. Hawo angoknyo kok dihiruik dalam-dalam, kok indak mati, mungkin pansan awak.

    Onddeeeeh tuaaan oiiii...capeklah cobaanko. Salasailah. Baun katiak jo baun angok Ajo Kuriak mancucuak rabu jo jantuang ambo. Mungkin kiro-kiro baunko lah baun narako mungkin. Urang kafir, urang murtad, urang pasiak ka dirajam di situ nantik. Ambo, indak kapia doh. Indak pasiak doh. Kini manga co iko pandaritaan ambo? Ajo Kuriak taruih bakucetak manggunda kapalo ambo. Antah baa lah ko kini.

    “Lah alah...capek se lah Jo...biaah bantuak iko sajo,” kecek ambo sambia bangkik manyentak dari kurisi cukuanyo.

    “Hehhhh manga takaja bana...diuruik saketek dulu...dibadak i lihia jo badan tu dulu...awak gagah rancak...” kecek Ajo Kuriak sambia mambelai daguak ambo. Hanndeedddd. Indak suko ambo digusuak co iko doh. Indak gadang bagai hati ambo dikecek an rancak jo gagah ko doh. Daguak awak nyo belai? Indak sakadar itu sajo..panutuik aksinyo....nyo iduuu pulo pipi abo. Diciumnyo bantuak mancium anak gadih. Ambo malompek. Inyo ambo tulak. Ambo bagageh baranjak, indak ambo bayia bagai upah cukuanyo doh. Mataaiilah waang gataaa...kecek ambo manyumpah nyumpah.