|
| Dendeng Masiak |
Mandanga kato dendeng sia sajo urangnyo pasti tau kalau makanan ko barasa dari Sumatera Barat. Baragam macamnyo dendengko nan tasuo, sabuaik sajo dendeng masiak, dendeng lambok, dendeng batokok, sarato dendeng baraciak.
Makanan nan tabuaek dari bahan dasa dagiang jawi ko sangaik disukoi banyak urang. Dagiang jawi diirih tipih pai agak leba. Sasudah tu digoreang masiak. Warnanyo nan itam diaduak jo lado merah, mambuek salero urang makin manjalejeh.
Baa caro manggoreang dendeng ko sainggo bisa itam sarato masiak, tapi indak paik? Koro-kiro apo pulo bumbu nan diparaluan untuak mambueknyo.
Tantu sajo nan partamo harus ado tu adolah dagiang jawi nan alah baiirih tipih pati agak leba sabanyak 500 gram. Kaluan nio dendeng tu dicampua jo kantang buliah juo. Katang nan awak paraluan 500 gram ukuran sadang elok dibagi ampek. Sasudah tu ado bumbu untuak diaduak ka dengdeng matah tadi. Nan patamo langkueh 2 cm, sudah tu ado sapadeh 1 cm, 8 incek bawang merah jo bawang putiah 4 incek sarato garam sacukuiknyo. Sasudah tu untuak ladonyo nan paralu awak sadioan adolah lado 250 gram sudah tu bawang merah 100 gram, limau sairih, indak lupo garam sacukuiknyo.
Kini awak masuak ka caro mambueknyo. Baa bana caro mambuek dendeng masiak ko. Patamo goreang kantang nan alah dibukak kuliknyo sarato alah dikarek ampek. Sudah tu bumbu nan alah disiapkan tadi langkueh, sapadeh, bawang putiah jo bawang merah ditambah garam sacukuiknyo digiliang aluih. Sudah tu dagiang has dalam nan alah diirih tipih tadi dicuci sampai barasiah. Salanjuknyo dagiang nan alah barasiah ko digalimangan jo bumbu nan alah dialuihan tadi.
Kalau bumbu alah rato digaliamangan kadagiang, daging disusun rapi dalam kuali. Sudah tu, dagiang ko diungkap sampai aianyo abih. Kalau alah abih aianyo, angkek dagiang tadi. Lajuik dagiang tadi ditokok lambek-lambek. Jan kuaik-kuaik lo manokoknyo. Kalau ditokok kuaik-kuaik caia dagiang ko beko.
Sudah tu dagiang nan alah ditokok tadi dikarek-karek agak leba. Karano kalau alah digoreng bekonyo susuik dan jadi ketek. Caro manggorengnyo supayo indak anguih sarato paik adolah jo api ketek. kato amak awak manggorenyo diunyai.
Sambia manggoreng dendeng ko awak giliang lado. Bagi kawan nan maleh manggiliang lado bisa diblender sado bahan untuak lado nan disabuikan dimasukan ka dalam blender ditambah jo minyak manih. Bagi kawan nan rajin bisa digiliang jo tangan. Kalau lado digiliang jo tangan rasonyopun babeda dan labiah lamak. Langkah patamo lado ditambah garam digiliang jan talalu aluih giliangnyo sudahtu tambahkan bawang merah giliang baliak.
Kalau alah salasai sadonyo kini awak goreang lado tadi. Sambia diaduak-aduak tambahkan asam. Aduak taruih sampai lado masak. Kalau lado alah masak masukan dendeng samo kantang nan alah digoreng tadi. Aduak sampai rato. Dendeng masiak siap disantap jo nasi angek.
.jpeg)
