×

Iklan

OLEH : BAHREN*
Bahasa di Bulan Bahasa

21 Oktober 2021 | 19:45:15 WIB Last Updated 2021-10-21T19:45:15+00:00
    Share
iklan
Bahasa di Bulan Bahasa
Bahren

´╗┐Menarik bana apo nan disampaikan dek Pak Musril Zahari pagi patang dalam kulaih umum baliau tantang Bahasa. Pandangan baliau di maso kini lah mudur bana kepercayaan diri urang awak dalam manggunokan bahasa Minangkabau. Jikok pun mamakai bahaso Indonesia indak pulo kameh sarato bana bahasa nan digunokannyo. Sabagai contoh liau mangatokan ado sakali wakatu liuan manjadi penguji ujian dotor, wakatu ujian itu dibaco dek liau tampek lahia calon dotor ko di Ikur Kota, manggeleng-geleng lah gaek ko, apokoh mukasuik dari Ikur Kota ko, karano kutiko ditanyo baliak dima Ikur Kota ko dijawek dek calon dotor ko indak jauah dari simpang Tabiang ka arah Bypass. Mako sasudah mandanga kecek calon dotor tu pahamlah liau nan dimukasuik tu iyolah Ikua Koto, jikok memang Ikua Koto kadijadikan bahaso Indoensia saharusnyo indak ditulih Ikur Kota, tapi tatap sajo lah ditulih jo Ikua Koto. Itulah bantuak jo usaho kito dalam mampartahankan bahasa wak, bahasa Minangkabau.

Mandanga curai jo paparan dari baliau Pak Musril Zahari ko, mako dek awak masih dalam bulan Oktober nan lah ditatapkan dek pamarintah sabagai Bulan Bahasa Nasional. Aratinyo bana, walaupun semboyan dari Badan Bahasa mangatokan Utamakan Bahasa Indonesia, Lestarikan Bahasa Daerah dan Kuasai Bahasa Asing. Mambari isyaraik kapado kito basamo baso, manggunokan bahasa Indonesia paralu untuak kito gunokan di dalam satiok kasampatan resmi karano memang bahasa Indonesia adaloah bahasa resmi dan bahasa pengantar di dunia pendidikan kito. Tapi untuak kapantingan mempertahankan bahaso daerah supayo ijan punah bahkan ilang mako alah sapatuiknyo lah kito dalam bicaro sahari-hari manggunokan bahasa ibu atau bahaso urang gaek kito sahari-hari sahinggo kakawatiran akan punahnyo bahasa daerah bisa saketek kito tahan.

Limbak nan dari pado itu, dalam bulan bahasa ko alah sapatuiknyo pulo lah, pamarintah daerah khususnyo di Ranah Minang ko mambuek sahari sajo dalam saminggu untuak manjadikan atau mampagunokan bahaso Minang di kantua-kantua langkok jo sikola-sikola guno manjago kabaradaan bahaso Minangkabau bia tatap tumbuah jo bakambang. Kacamehan urang-urang nan manaliti bahasa dan mangatokan baso Minangkabau akan hilang dalam jangka wakatu tujuah puluah tahun ka muko. Baa dek baitu kato peneliti tu, karano mulai ilangnyo kosa kato nan lah lamo-lamo dan indak dipagunokan lai dek nan mudo-mudo kini ko dalam batutua jo bakato sahari-hari.  

Usaho nan lain nan bisa dikarajoan iyolah, sarupo nan dibuek dek koran Khazanah ko, nan tatap manyadiokan sahalaman panuah dalam saminggu tabik ado barita, carito dan rubrik-rubrik koran nan ado manggunokan bahaso Minangkabau. Satidaknyo dangan adonyo usaho nan bak nangko aratinyo bana semboyan Badan Bahasa nan mangatokan lestarikan bahaso daerah itu alah pulo kito pabuek. Tantu sajo indak putuih dek koran Khazanah sajo untuak manyadiokan halaman khusus babahaso Minangkabau, sadapek dapeknyo lah media-media nan lain sato pulo sakaki dalam usaho mampartahankan bahaso Minangkabau ko.  Mako molah mumpuang di bulan bahasa kito kumbali manggunokan bahasa Minangkabau dalam batutua kato sahar-hari dan manggunokan bahasa Indonesia dalam suasana nan resmi. Selamat mengggunakan bahasa di Bulan Bahasa. *Dosen Sastra Minangkabau FIB Unand