|
| Anyang Pucuak Ubi |
Sakali-sakali adoh masonyo mintuo datang batandang ka rumah minantunyo untuak malapehan taragak ka anak sarato cucunyo. Sabagai minantu nan sayang ka mintuo, lah tibo lo masonyo untuak dunsanak mamanjoan salero mintuo ko mah.
Tapi baa supayo mintuo sanang sarato liau bisa cepak cepong makan jo samba kampuang awak nan idak talampau gadang bana pokoknyo doh ? Tanang se lah sanak, Uda Febriansyah Fahlevi jo sanang hati basadio manunjuak-annyo !
Nan partamo bana sanak paratian adolah, kauntuak urang tuo-tuo sarupo mintuo sanak tu, sabananyo indak ka gadang bana pokoknyo tu doh. Nan pantiang samba nan kadihidangkan tu iyo lai sabana makanan khas urang awak Minang.
Banyak contoh makanan urang awak nan bisa sanak buek, untuak hari partamo Uda Fahlevi manyarankan bueklah samba anyang pucuak ubi, buliah nak tabukak salero mintuo awak tu.
Bagi dunsanak nan giginyo alau mulai guyah atau alah mulai rarak ciek-ciek, apolai uban alah mulai banyak tumbuah di kapalo, dipastian tantu bana jo bahan-bahan apo sajo nan diparaluan kauntuak mambuek anyang pucuak ubi ko.
Nan paralu sanak sadion daun pucuak ubi atau daun sampelo agak satangah kabek, kacang panjang agak satangah kabek, toge saparampek kilo, sarato mantimun agak duo incek.
Kalau alah langkok sayua tu, sadioan juo tarasi agak sagadang ampu jari, lado merah agak sa-ons, lado gilang sasendok, asam kapeh saincek, karambia nan alah bakukua satangah incek, lado kutu agak sangenek (bilo diparaluan), garam sasuai salero surang-surang sarato kunyik agak salayang.
Kalau alah langkok bahan-bahan tu, jaan sanak padiaan se di ateh meja, sabab indak adoh gai jin nan baik hati tibo manolong mamasak-an doh !.
Untuak tu, abuih lah daun pucuak ubi atau daun sampelo, kacang panjang sarato toge tu. Jikok alah masak, angkek sarato sisihan se dulu.
Sasudah tu sayaua nan alah diabuh tadi campuaan ka karambia nan alah bakukua sarato campuan pulo ka tarasi, lado merah, lado gilang, asam kapeh, lado kutu, garam sarato kunyik sampai sabana-bana marato
Jikok samba anyang pucuak ubi tu alah
masak, makan lah samo-samo jo mintuo tu lai. Tapi ingek, jan sampai galak
takekeh-kekeh di muko mintuo tu. Sagan awak, jago juo lah wibawa tu !
